́Kilúúme kí iŋɔ́mb ni iŋún
Ni iŋɔ́mb ni iŋún mapá pekul.
Epue puɔ́sí iŋɔ́mb yaayɔɔk ku ekúl wɛɛyɛ́ iŋún ɛ́ɛ́ wɔ́ɔ́piɔ́l muenyí.
Iŋuné kɛ́ɛ́yɛ́ ɛ́ɛ́: "ekúl amɛ́, ɛɛ́nyɛ́l tiɛkíɛ́ ɛ́ɛ́ íŋondinyie?".
Iŋɔ́mb kanyi kɛ́ɛ́yɛ́ ɛ́ɛ́: "etitumen, yoónyíkuondinyi".
Iŋúnéé tá é muenyí weeki iŋɔ́mbíɛ.
Iŋɔ́mbíɛ yááŋ weelek, woonyiondó kɛ́ɛ́yɛ á niana é pukúm mɛnɛmɛnɛ́ɛ, ukanyi waasitápɔ́k iŋun yooson wú é kietélié. Woówon wú ɛ́ɛ́: "ekúl amɛ, akáánɛ́ kɔkɔ akasimfá muenyí muámɛ nííkée?".
Iŋɔ́mbi kanyi kɛ́ɛ́yɛ́ ɛ́ɛ́: "ekúl amɛ, índɛ anyi na pukaaka óló ɔsíkɔ́l muenyí múáwɔ kuamɛ".
Iŋun kanyi kɛ́ɛ́yɛ́ɛ́ɛ́:"anakáanié?".
Iŋɔ́mbiɛ́ kɛ́ɛ́yɛ́ɛ́ɛ́:"cáp! yá anakáanɛ́".
Puɔ́sí púmotí iŋún ɛ́ɛ́pí ká akanyí ɛ́ɛ́: "ɔ́ɔ́n kitétí kíámi ekíné. Ɔ́kɔ́l tuna tuɛ́yɛ́ íímáŋanya na túu nuɔ́l kitikit óónd ímbítikɛn ekéné kɔ́ ɔtɛm ú ɔɔ́nd".
Akaándɔ́ wɛɛl aná ɔnɛm maátíán wɔ.
Iŋɔ́mbí mɛɛl wɛɛ́nɛn tuna, waanyiapíyapá wuus wɛɛsisɛmbɛ́ tuna, waayɔɔk na túu kɛ́ɛ́y á niana, ukanyɛ́ɛ́ kuolúnó tuna á kunyánan. Wooluno, wooluno, wuɛ́ɛ́nkuɛ́nɛ iŋún kanyi kɛ́ɛ́yɛ́ ó pusio.
Inúné kɛ́ɛ́yɛ́ ɛ́ɛ́: "ekúl amɛ́, iŋú muɛ́t ewe ímányiasíám yɔ́ɔsikɔl muenyí muámɛ".
Iŋɔ́mb kaná kuand kuɛl tiɛkiɛ.
Iŋúné kúá kkɛ́ɛ́yɛ́. Wɛɛ́pí kɛ́ɛ́yɛ́ ɛ́ɛ́: "tápa kátapa, ínanɔ ewe aákimfáan muenyí múámɛ".
Iŋɔ́mbíɛ weeki iŋúné muenyí múɛ́yi, wú kɛ́ɛ́yɛ́ ɛ́ɛ́: "yɛ́ɛ́n kɔk mɔɔnd ukánɛ́ ekuselesíe".
Iŋún ɛ́píkɛ́ɛ́yɛ́ ɛ́ɛ́: "iŋú puandá imányamba mápá muenyí muámɛ".
Iŋún yaanyapíyápá kí itítólio í pukúm, yaasikuá tum e kúúsí. Tɔɔ́pɔn ɛɛ́nɛnɛ́ kitɛ́ɛ́tɛ́k kí iŋún imendi ni imend.
